تاریخ نشر:20.06.2007

امرالدین سرحد

دښتې

دا سپیرې سپرې دي دښتې
څومره رنګ دي په سرو وینو
چا یرغل کې تویې کړي
چا پر ضد د یرغلګرو

ځینې ناست دي غره لمن کې
غږوي خپلې شپیلۍ
چا پرون ټوپک غوړ کړې
نن جاغور کې ږدي مرمۍ

څوک رخصت شول له جهاده
جوړوي لوړې ماڼۍ
بل لګیا دی په جګړه کې
کور کې نه لري شړۍ

چې پرون په نیلي سپور و
نن ګدا د یو مړۍ
دی خو پوه دی څه تیریږي
شمله ساتي د پګړۍ 

له غره کښته قوماندان شو
خرڅوي او ککرۍ
ځنیي ناست دي په جبهه کې
تسبیح اړوي پردۍ